Saprak 16 September 2013, Kota Bandung téh gaduh pamingpin anyar nyaeta Bapak M. Ridwan Kamil. Anjeunna langsung ngadamel loba parobahan, salah sahiji na "ngaramekeun" deui Rebo Nyuda. Rebo Nyunda téh saleresna mah atos diprogramkeun ti jaman walikota Dada Rosada, nanging kusabab anjeunna téh teu loba gerakan ngajak ngagunakeun Basa Sunda di poé Rebo, janten Rebo Nyunda téh teu populer.

Ayeuna, pas Bapak Ridwan Kamil atos dilantik janten Walikota Bandung anjeunna ngajak wargi Bandung ngarayakeun poé Rebo minangka Rebo Nyunda. Anjeunna langsung ngagunakeun Basa Sunda di social networkingna jiga di Twitter jeung Instagram.

Teu ngan saukur ngagunakeun Basa Sunda, anjeunna oge ngajak wargi Bandung ngagunakeun pakéan adat Sunda. Anu pameget nganggé acuk pangsi, lamun anu awéwé mah nganggo kebaya.

Usaha pamaréntah ngamopulérkeun Basa Sunda ngagunakeun media sosial téh kedah diapresiasi. Kusabab, ayeuna téh ti panitén abdi minangka siswa SMA di Kota Bandung leuwih loba barudak anu ngahargaan budaya batur, contona Korea, Jepang, sareng Barat dibanding budaya nyalira nyaéta budaya Sunda.

Tiap poé rebo di sakola abdi nu katingal ngangge iket salain guru téh tiasa dihitung ngangge jari. Basa Sunda téh kudu dikampanyekeun ka kaum muda. Ngagunakeun media sosial téh salah sahiji langkah besar jeung éféktif kanggo ngajak kaum muda ngagunakeun Basa Sunda tapi tetep kedah aya langkah anu leuwih éféktif deui.

Ayeuna atos loba anu ngadamel aplikasi kamus sunda kanggo di HP. Abdi gé atos nyoba ngadamel hiji hal nu tiasa ngamopulerkeun deui Basa Sunda, salain nganggo iket Sunda abdi ogé atos ngadamel hiji aplikasi anu tiasa ngubah huruf romawi ka aksara sunda di situs abdi. Situsna tiasa dibuka di www.frachiemy.com/konverter_sunda/konverter.html. Nepi ayeuna aplikasi konverter sunda éta tiasa dibuka lewat HP jeung komputer lewat browser nu kedah aya konéksi internétna, tapi kapayunna abdi gaduh rencana aplikasi éta téh tiasa dibuka khusus di HP anu teu aya konéksi internétna.